كيفية زراعة النعناع

السلام عليكم ورحمة الله وبركاته


حبيباتي الستات .. كتير سألوا عن طريقة زراعة النعناع ودي الطريقة بعد نجاحها بحمد الله

المطلوب:
نعناع أخضر طازج من الهيبر
تربة (رمل أو بيتموس)
ماء

الطريقة 
اول ما تشتري النعناع من الهيبر وهو طازة واخضر تختاري حوالى عشر اعواد وتقطفي الورق منهم خالص وتحطيهم في كوباية فيها شوية ماية على رخامة المطبخ او في مكان فيه إضاءة وتغيري المية دي كل يوم.

بعد حوالى اسبوع حتلاقي الأعواد بدات تطلع جذور وبراعم خضراء
بعد اسبوع كمان لما يشد حيله شوية انقلية للتربة بتاعته 
واسقيه بانتظام حسب ما تلاحظي حتياجه للماء (يعني التربة تبقى رطبة) ومتزوديش علشان التربة متعفنش..

البيتموس هو التربة السودا بتاعه نباتات الزينة وانا جبتها من واحد بتاع أدوات زراعية قريب مني
بس هى مش لازم تربة رملية نضيفة من اللى ماليه الدنيا هنا حتقوم بالمهمة

والشالية بقى هي قارورة ماء قطعتها وغلفتها بورق لاصق ملون من عند ابو ريالين


النعناع بيحتاج جو معتدل لو الجو عندك حر اوى تحطيه في حجرة المعيشة اللى فيها التكييف ولو الجو بارد أوي مش تطلعيه بره 



ودي صورة النعناع بتاعي بعد تقريبا شهر.. قولوا ما شاء الله لا قوة إلا بالله





تجربتي القادمة زراعة الفراولة ..

ويلا بينا نزرع الصحرا